Todo o que debes saber sobre a nova regulamentación da Seguridade Social sobre as incapacidades temporais

Entre moita polémica polo poder que se lle da ás mútuas con relación á alta en enfermidades comúns, publicouse en 2014 a nova "Lei de mútuas" e o RD 625/2014 de xestión de incapacidades. Estas normas xa avanzaban os cambios dos que hoxe en día falan os medios de comunicación e que xa faloron precisamente o ano pasado cando se publicaron.

En xuño de 2015 chegou a Orde ESS/1187/2015 de desenvolvemento se ben ata o 1 de decembro non entrou en vigor. Precisamente, a raíz desta entrada en vigor, volven a facerse eco os medios de cousas que xa se coñecían, pois coa entrada en vigor desta Orde só se matizaron algúns aspectos ou ben se fixeron públicos os novos modelos de partes de baixa, alta e confirmación.

Deixámosvos a continuación material que vos pode ser de utilidade na vosa xestión das incapacidades temporais nos primeiros 365 días de duración, ou o que comunmente coñecemos como "baixas":

Política Social segue pasando polo arco do triunfo as sentenzas do TSXG

Reunirse coa representación do persoal non equivale a negociar.

O Comité de Empresa de Política Social da Coruña con data 25 de Novembro de 2015 trasladaba un escrito á Xefatura Territorial é á Secretaría Xeral Técnica co fin de proceder a unha negociación real das quendas de traballo e os seus criterios. Recordamos que este comité ten gañadas tres sentenzas ante o TSXG por incumprimento da Xunta da súa obriga de negociar as carteleiras, a última de outubro deste ano.

Pois ben, recibiron ao comité de empresa o 1 de decembro (o que fan 3 sentenzas do TSXG...). As persoas representantes da consellaría din o seguinte:

Regulamentación de permisos para as eleccións do 20 de decembro

No DOG do 2 decembro publícase a resolución onde se regulan os dereitos electorais do  persoal  ao  servizo  da  Comunidade  Autónoma  de  Galicia nas eleccións convocadas para o día 20 de decembro. 

Esta resolución afecta tanto para o persoal que tendo queda de traballo ese domingo, como para aquel que forme parte dunha mesa, dunha candidatura, ou actúe como intereventor/a ou apoderado/a.

Accede á resolución

A Xunta estáfanos 33 millóns nas pagas extras do 2013 que recoñece a Xustiza

Catro novas sentenzas só nos Servizos Centrais da Xunta favorables á recuperación dunha cantidade que oscila entre 130 e 500€ correspondentes á paga extra de xuño de 2013. Destas, tres xa foron pagadas coa nómina de novembro.

A contagotas van chegando as sentenzas xudiciais pero todas baixo un mínimo común denominador: recoñecen o dereito a 1/3 do complemento específico na paga extra de xuño de 2013. A maiores, unha delas, ao haber silencio administrativo, estima na súa totalidade a recuperación dos dous complementos específicos das pagas extras do 2013 e mesmo condena a 400€ en custas procesuais á Xunta. As catro sentenzas recollen que á cantidade que se ten dereito a percibir débenselle engadir os xuros desde a data de reclamación.

Campaña vixiancia da saúde para persoal de centros de ensino: solicitudes até 10 de decembro

Ábrese o prazo para solicitar as revisións médicas de empresa para o persoal que traballa en centros docentes da Consellaría de Educación. Remata o 10 de decembro.

Mediante a Resolución da Secretaría Xeral Técnica da Consellería de Cultura, Educación e Ordenación Universitaria, do 27  de novembro de 2015, autorízase a difusión da campaña de vixilancia periódica da saúde para o persoal docente e non docente destinado en centros docentes públicos non universitarios dependentes da Consellería de Cultura, Educación e Ordenación Universitaria.

A Xunta duplicará a súa PRESUNTA oferta de emprego público no ano das eleccións autonómicas

Para 2016 prometen máis de 2000 prazas de emprego público, así o anunciou o conselleiro de Facenda na súa intervención parlamentar do martes, 24 de novembro. Este ano a oferta foi dun total de 1163 prazas das que 1/3 foron para para Administración Xeral.

Estas últimas semanas soaba na prensa que se duplicaría a oferta de emprego público da Xunta para o ano que vén. O primeiro do que se soubo foi Ensino porque o conselleiro de Educación xa o anunciara no Parlamento a finais do mes pasado a convocatoria de máis de 1.000 prazas. Despois algúns medios, previo pago, desglosaban mesmo os datos do resto dos 2000 postos que facilitou o conselleiro.

En reunión do 27 de novembro o director de Función Pública ofrece as seguintes pinceladas adicionais: desminte o publicado nalgúns medios de convocar as 700 prazas de incendios que están en réxime de temporalidade,  fala de que como moito serán 200 prazas en Administración xeral entre persoal funcionario e laboral, que por primeira vez se ofertarán 6 prazas específicamente para a quenda de persoas con discapacidade intelectual, que valoran sacar o proceso de funcionarización na OPE 2016 e que nada da consolidación das OPE 2008 que para 2016 o Ministerio de Facenda non autoriza

Modificación da RPT dos órganos superiores da Presidencia

Achéganos a Secretaría Xeral da Presidencia unha modificación da RPT dos seus órganos superiores (Emigración, Medios, Deportes e a propia SX da Presidencia). Dan de prazo para facer alegacións ata o 14 de decembro.

Descargar proposta

Nesta proposta avánzase na estratexia da Xunta de inverter a súa pirámide de recursos humanos, amortizando unha pila de postos base para crear postos de nivel. A nivel de promoción profesional é positivo ter postos de niveis 18 e 25 aos que poder concursar pero non a costa de seguir segando por abaixo. Con esta política estamos vendo situacións de servizos sen ninguén debaixo ou con moi poucas persoas e mesmo sen ningún posto base e logo virán as subcontratas (con ou sen 3%), as asistencias técnicas ou encomendas de xestión.