O Servizo Galego de Saúde coloca a persoal da súa confianza sen ter a categoría esixida

A Consellaría de Sanidade utiliza de xeito perverso a figura da comisión de servizos para colocar a amigos e amigas en postos de responsabilidade, moi ben remunerados e sen ter a titulación requirida para exercer esas funcións.

Xa en xuño de 2011, a CIG-Autonómica, denunciara os trapicheos que, naquel momento, manexaba a Consellaría de Sanidade con respecto á colocación de persoal en postos, sen cumprir a normativa de Función Pública. Naquel momento, denunciárase que tanto a daquela vicexerenta do Sergas, Mª Eugenia Lado Lago, como a subdirectora de Desenvolvemento e Seguridade Asistencial, Mercedes Carreras Viñas, non cumprían cos requisitos necesarios para ocupar estes postos. Na actualidade aparecen “cesadas” das súas funcións, segundo o directorio telefónico da Xunta.

Boletin da CIG San Caetano: Feijoo abdica

Xuntamos unha nova edición do boletín de Servizos Centrais.
Neste número, aínda máis fresco e retranqueiro que nunca pero reivindicativo e transgresor coma sempre, temos:

- Editorial. Crise en San Caetano: Feijóo abdica.
- Novas e denuncias en destaque:

* Poderían, poderían... pero non queren

* Entrevista con José María Barreiro (director xeral da Función Pública)
- A contra: A Xunta regálache un chiringuito

Pincha aquí para descargar o boletín verán 2014.

Tamén para difundir en Calameo.

Por unha promoción interna real na Xunta de Galiza

Despois de todo os "puteos" que nos ten sometido a Xunta, agora veñen cunhas convocatorias de promoción interna que son de coña. Semella máis fácil entrar na Xunta a través dun chiringuito que promocionar internamente cando xa estás dentro. Cómpre lembrar tamén que o resto do persoal da Xunta non funcionario de corpos xerais (persoal laboral ou persoal funcionario de escalas) ten procesos de promoción interna que son tan de "promoción interna" como o que agora botou enriba da mesa Función Pública para os corpos xerais.

Hai que mobilizarse, estamos recollendo apoios na plataforma Change.org; con cada sinatura mándaselle un correo co texto da petición ao Presidente da Xunta, á Conselleira de Facenda e ao Director xeral de Función Pública. 

Falamos do dereito a promoción profesional real de todo o persoal na Xunta de Galiza pero poden asinar tamén familiares, amigos ou compañeiras e compañeiros doutras Administracións, nas que si que hai OPEs de promo interna todos os anos e estas convocatorias son de promoción interna de verdade.

Tamén te facilitaremos varios cartaces diferentes (ou podes crear o teu propio e mandárnolo tamén) para que empapeles o teu centro, nos xa o fixemos por San Caetano.  

Descargar cartaz Promoción Interna SI, Putadas Internas NON

Descargar cartaz Promoción Interna VS Intragación dos chiringuitos

A volta de verán preparamos concentración. 

Saúde e a loitar polo noso dereito á promoción profesional!

A Xunta tarda 3 anos en resolver o posto de subdirector/a xeral de Urbanismo

Unha das últimas actuacións do exconselleiro de Medio Ambiente, Infraestruturas e Territorio, Agustín Hernández,  antes de marchar da Xunta.

No 2011 foi anunciada publicamente a cobertura do posto de subdirector/a xeral de Urbanismo pero non foi ata o 26 de xuño de 2014 cando se resolveu. Resulta bastante chirriante cando a normativa de cobertura de postos da Xunta establece expresamente que o prazo máximo para resolver este tipo de convocatorias (libre designación) será dun máximo de 2 meses.

Hai que ter en conta, ademais, que esta praza leva todos estes anos ocupada de xeito temporal e irregular polo mesmo funcionario provinte do concello da Coruña e que foi finalmente nomeado para o posto. Deste xeito, prodúcese tamén un reiterado incumprimento das instrucións de Función Pública para a cobertura temporal deste tipo de postos (6 meses ampliables por outros 6).

Máis aló do atraso evidente e da pouca seriedade coa que a Xunta de Galiza se toma a súa propia normativa, chama a atención a falta de racionalización do gasto público para os postos de libre designación, engordando nunha nómina máis que vén doutra Administración. En determinadas situación, esta sección sindical advertiulle á Xunta que na cobertura deste tipo de postos estimase a preferencia do persoal funcionario autonómico diante de traer máis persoal doutras Administracións.

Boletín da CIG San Caetano: Non á integración dos chiringuitos

Achegamos o Boletín da CIG nos Servizos Centrais da Xunta de Galiza, un dos boletíns sindicais con maior difusión de todo o país e maior lectura entre as traballadoras e traballadores públicos da Xunta de Galiza.
Neste número:

- Non á integración dos chiringuitos na Xunta
- Cousas que cheiran na Xunta (denuncias breves)
- Breves (toda a información da Función Pública autonómica: concursos, procesos selectivos, rpts...)
- Humor ou non: Quen cumpre o código ético de Fejióo e quen non.

Podes lelo aquí

Medio Ambiente segue renovando as mesmas encomendas que xeraron 14 sentenzas de indefinición na última RPT

No DOG 14/05/2014 publícase unha nova encomenda de xestión da Consellaría de Medio Ambiente, Infraestruturas e Territorio para que Tragsatec lle preste "apoio técnico cualificado" á Subdirección Xeral de Meteoroloxía e Investigación.

A dita publicación no DOG adoece de información substancial sobre cuestións tan básicas como a xustificación técnica da falta de medios propios, a achega de medios materiais e humanos da empresa, o custo económico ou se realizarán os traballos dentro dos centros da propia consellaría. Por outra banda, chama a atención que a publicidade desta encomenda se realiza máis de 4 meses despois do seu comezo.

A burla do informe dos órganos de representación sobre as flexibilidades familiares

Existen centros dos Servizos Centrais da Xunta de Galiza que solicitan o informe aos órganos de representación mesmo unha vez esgotado o prazo legal para resolver.

A Xunta de Persoal dos Servizos Centrais vén de dirixir unha batería de escritos a cada unha das secretarías xerais e máis a Función Pública e Avaliación. Estes escritos fan referencia á obriga legal de solicitar informe aos órganos de representación nas flexibilidades familiares. Non só se detectan erros sustancias interpretativos da lexislación actual por parte dos distintos departamentos, senón que existe un atraso evidente na tramitación das flexibilidades familiares e un defecto no envío de documentación para elaborar o informe.