Na
mesa sectorial do día 13/10/2025, a dirección xeral de Emprego Público afirmou que a baremación provisional do concurso de corpos
xerais sairía durante o mes de novembro, e repetiu a mesma
afirmación na mesa xeral do 7/11/2025. Ante o recente anuncio de que
as listas definitivas de admitidos e excluídos do concurso de corpos
xerais estarían para o día 14 de novembro, pregunteime, iluso de
min, se aproveitarían para sacar tamén a baremación provisional
xunto a citada lista, pois parecía bastante lóxico.
Chamei
esperanzado e xovial a Emprego Público e, como tantas outras veces,
como si fora o protagonista dunha película cómica, recibín unha
xarra de auga xeada na cabeza a modo de resposta: "O día 14 só
sairá o listaxe de admitidos/as e excluídos/as. Sobre a baremación
provisional no mes de novembro non te digo nin que si nin que non..."
Eu
díxeno, vive deus que o dixen: “A directora de emprego público
asegurou que a baremación provisional sairía perante o mes de
novembro. Está nas actas das mesas sectoriais!”. Pero foi como
falar ao profundo dunha cova ou ao fondo dun pozo. Case puiden
escoitar o eco da miña voz ao outro lado da liña, como se me
respondera un abismo.
Botando
a vista atrás, lembrei con nostalxia a época en que os concursos
convocábanse nunha data determinada e estaban resoltos nun ano
xusto. Daquela, pensabamos que un ano para resolver un concurso
era unha cousa excesiva, un desatino tremendo que non se explicaba. E
iso que nesa morriñosa época os/as funcionarios/as éramos como
artesáns e baremábamos os concursos coa man, contando os méritos
como se contan moedas. Ante a nosa desesperación pola tardanza,
dende as altas instancias, un tal Barreiro aseguraba
que en canto houbera unha ferramenta informática, os concursos
resolveríanse na metade dun segundo premendo co dedo índice a
tecla ENTER.
O
concurso do ano 2019 tardou case catro anos en resolverse.
O
concurso actual leva convocado ano e medio e, a 10 de novembro, aínda
non saíu nin sequera a lista definitiva de admitidos/as e
excluídos/as, prevista para o día 14.
Ademais
de ser unha falta de respecto ós/ás traballadores/as, todos e todas
sabemos os problemas que están a traer a súa tardanza nas
convocatorias e nas resolucións dos concursos (xerais e
específicos).
No
caso de que a esperada baremación provisional non saia este mes,
invito a todas e todos a que preguntedes vós mesmos. Aínda que é
posible que en vez de obter unha resposta, teñades o sentimento de
falar co fondo dunha cova ou dun pozo.
Ou
quizá non faga falta. Eu penso que esta vez si, que esta vez a
directora de Emprego Público cumprirá a súa palabra e a famosa
baremación estará lista en novembro, e despois, axiña, sairá a
baremación definitiva, a adxudicación de postos e as tomas de
posesión. E logo, haberá un concurso permanente e unha carreira
profesional automática, promocións internas cada ano, as comisións
de servizos se conseguirán por méritos e un longo etc., de boas novas
en Emprego Público porque, por fin, funcionará dun xeito normal e
non interesado... Non perdamos a esperanza, que é o penúltimo que
se perde.
Ningún comentario:
Publicar un comentario