Convocadas as actividades de formación continua da EGAP do segundo semestre do ano

O DOG do 26 de xuño recolle a resolución da Escola Galega de Administración Pública (EGAP) coa relación de cursos dirixidos a persoal empregado público para o segundo semestre do 2018.

A EGAP convoca 57 actividades formativas e 1950 prazas dirixidas ao persoal ao servizo da Administración xeral da Comunidade Autónoma de Galicia, das entidades públicas instrumentais do sector público autonómico e da Administración institucional.

As solicitudes poderán facerse desde as 8 horas do 27 de xuño ata as 23.55 horas do 6 de xullo na zona de matrícula da EGAP (http://egap.xunta.gal/matricula). O número máximo de cursos que se poden solicitar limítase a cinco.

Dentro do prazo de presentación de solicitudes as empregadas e empregados públicos pertencentes a entidades, organismos ou institucións públicas, cuxos datos non figuren na base de datos da Dirección Xeral da Función Pública, deberán enviar a xestion.egap@xunta.gal un certificado expedido polo órgano responsable de persoal no que se indique a súa situación administrativa, o tipo de persoal e a antigüidade na Administración.

Máis información e listaxe de cursos no DOG do 26 de xuño.