Búscase xerente/a para a nova Axencia Galega de Servizos Sociais

Resolucións sen asinar ou publicación de persoas admitidas e excluídas sen nomes e apelidos son algunhas das irregularidades deste proceso.

Esta axencia é o buque insignia dos neochiringuitos: pretende mesturar o persoal do Consorcio de Benestar co persoal de Traballo e Benestar da Xunta, todo iso dirixido polo persoal directivo que nin unha oposición ten que pasar e que está chamado a ocupar os postos de responsabilidade e dirección nestes macroentes.

Pois ben, o primeiro é o primeiro, nomear a persoal afín para os postos importantes, que nin persoal funcionario ou laboral da Xunta ten que ser. Está aberto a contratación de alta dirección cunhas titulacións esixidas alonxadas do que son os servizos sociais (Dereito ou LADE).  Hai fortes presións políticas para comezar a por en funcionamento esta axencia o 1 de xaneiro de 2015, ollo non para aumentar as prazas de garderías públicas, para aumentar os medios das residencias de maiores ou de de persoas discapacitadas, non, iso, non, o primeiro é nomear aos amigos do partido en postos importantes.

A lei di que as condicións deste persoal non son negociables (a nivel de Mesa Xeral, claro) e di tamén a lei que os procesos selectivos tampouco o son. Porén, é necesario dar certa aparencia de legalidade a todo isto. Sácanse convocatorias con anuncio web e tamén nos taboleiros de anuncios, moi perfiladas, na que na maioría de casos só concorre o “amigo” ou “amiga” en cuestión.

O problema é que, polas presas, xa nin se gardan as formas. No caso que nos ocupa, o de futuro xerente ou xerenta desta axencia, o venres pasado, cunha ponte polo medio, colgaron no taboleiro de anuncios da Consellaría de Traballo e Benestar en San Caetano un par de resolucións realmente curiosas: levan selo e papel oficial pero a directora de Familia e Inclusión esqueceu asinalas. Descarga documentación fotográfica.

Por se non fora bastante, se imos á páxina web da Consellaría, onde custa atopar a información (está en “sala de comunicación/novas/Familia” non en “transparencia” ou “procesos selectivos”). Pois ben, se no web buscamos a listaxe provisional de persoas excluídas e admitidas observamos que todas as 3 persoas que se presentaron foron finalmente admitidas tanto na fase provisional (1 de decembro) como na definitiva (5 de decembro). O problema é que non hai nomes nin apelidos, só DNIs. Desde cando nun proceso selectivo público, que se paga cos cartos públicos, non se publican nomes e apelidos?

Pode que os postos sexan totalmente dixitais, que non pidan superar unha oposición e que teñan unhas retribucións “directivas”, pero nomes e apelidos hai que poñer. E por suposto, as resolución tamén hai que asinalas. Mandamos nota á propia Dirección Xeral e máis a de Función Pública para que o emenden e de paso tamén suxeríndolle que aposten máis polo persoal propio da Xunta de Galiza, que “estamos en crise" e deixen de traer xente de fóra.

Actualización (26/12/2014): publícase a lista provisional de puntuacións; agora xa aparecen nomes e apelidos das persoas candidatas.

Actualización (02/01/2015): publicación da lista definitiva de puntuacións.

Descargar formato CIG-Informa